過鐘意既日子

這兩個月心情都嘛嘛，工作品質唔係幾好，啲嘢成日錯。原因好多既，但就唔深入，自己知就算。而且我都知道自己唔適合依家份工，都無乜特別，有錢收就梗硬做住先。鬼叫自己無能力搵夠自己錢開飯。

最近唸緊不如去買啲股票，但長遠都係要收租，風險低啲。掙扎咗廿年，突然唸，唉，原來我以前睇唔起，或者好俗氣既唸法，先至係重要既嘢。個啲咩理想呀，期望呀，毫無意義。連個瓦遮頭都無，學咩人講興趣理想。而唔經唔覺，就咁樣係個情況滾動咗廿幾年，計一計自己都四十。依然唔係好知道自己做緊乜，依然唔係好開心。

呢種情況都唔知同邊個講好，一旦發生，就好唔開心。來來回回，總之，就唔開心。而呢種唔開心回過頭嚟都係個種因為自己無能力養起自己既問題。最近係到唸，如果我有好多錢買樓收租，會唔會就會覺得富足而唔開心？可能可能解到一時，解決唔到我對呢個世間既厭惡。而到底點解我會對呢個世界咁厭倦。真係唔知。剩係有生、有死呢種情況，已經令我好唔開心。我覺得，人，或者呢個世界係唔應該有生死、唔應該有生滅，呢個係唔合理既。

依家唯一既目標係，剩低落嚟既日子，盡量做多啲自己鐘意既嘢。反正日子都係咁過，係可以既範圍，選擇自己鐘意既方式過日子。