最後時光

 不知不覺情緒整理這系列毫無參考價值的號碼寫到100。這些年有個奇怪的習慣，心情不安時，就跑去看星座。這兩三天的心情不安，是源自受夠了台灣人的工作和做事方式。扭嚟扭去，問佢點做，答案係咩，佢叫我走去問senior。走去問senior，senior又叫我去問原本個個。

既然係咁，我就擺低先，佢唔急，我就唔急。等到佢急啦，兩條友走去拆先發現，退我個個係憑直覺，無任何原因。senior同佢傾完一輪，叫我重新送件。送完，又退。咁，我再擺一陣再講。唔撚想理。依家有啲回復到當年係觀塘個時，被動啲，唔好咁主動。

公司好多我唔OK，例如居然通過咗，出年唔達標，係可以直接扣人工、降職。我心唸，吓，本身已經拎緊最低工資。咁我點解要繼續做？依家唯有希望，快啲搵到新機會。好想靠自己賺夠錢，生存落去。可惜係依家連做邊一類型工作可以搵到錢都仲未知。

一年無問，上個月抽咗兩支籤，一為事業，一為恩緣。兩支都係話唔好再問，上天自有安排。繼續keep住就OK。咁當然，我個心依然都唔係好安樂。可能係因為，無一個明確收入來源。然後就唸，總之乜都唔好理，要間公屋先啦。但又要唔到。暫時。

有唸過，之後要點。有同事話，要唔要返學校。又講真，學校教職係穩定。但我唔覺得自己有能力做到全職學校職員，教唔到書，做研究又無實力。我亦都唔想讀master。唸兩唸，可能比較合理既做法係收租，但前題係除非中六合彩，如果唔係，應該無乜可能。

點樣搵夠合理而足夠收入維持生活，真係，好難。朋友都鬧得我岩，我仲好似佢地17、8歲個時咁，煩惱緊搵朝唔得晚。總之，呢個問題，一日在生，一日都要解決。邁向讀大學時既目標，安居樂業。然後，靜靜地搵一棵樹，安靜地度過最後時光。