算死草

岩岩簽咗公司份線上同意書先發現，好撚仆街。事源係前排國定假日值班，我就問同事，國定假日double pay，咁係咪補返一日俾我呀？同事話，唔係呀，得半日。OK囉，咁半日咪半日。我係無乜所謂，本來，如果公司規定係咁。咪硬食。

點知過咗兩日收到兩封線上同意書。第一封係，同意我調班，由國定假日，調去一個普通既星期六。第二封係同意我補休。我其實睇唔明，點解要由一個假日，調班去另一個假日。本來我想問同事，不過已經OT到七點，就算。

第二朝起身，我唸咗輪。哦！原來係因為國定假double pay，佢唔會俾，咁所以首先要「我本人同意」將當日返工時數，搬去一個普通唔洗double pay既普通假日。然後再用普通假日，嚟填返我既時數。我唸咗輪，哇diu，算死草到呢個地步。

無計，鬼叫自己廢，仲未可以獨立作業。忍一忍。以前就係乜都唔忍，乜都出聲，先至搞戶咁。我會做到既，自己獨立作業，uber又好乜都好，搵夠腰骨錢，就好了。但可能，我腰骨太硬，要好多好多錢都未定。

咁當然最理想係求鳩其寫啲嘢然後就有錢，但世界，無咁簡單。以我既能力，查實無信心做到。有時會覺得唔止綜合能力，單一能力我都無。憑乜覺得自己可以獨立作業？但如果我無辦法獨立作業，就永遠都只會停留係呢個階段。我唔想，極之唔想。