不受歡迎

 

最近工作一般般，沒甚麼心情也沒甚麼靈感。倒是寫了一兩篇文章，算是把近半年的一些想法寫出來了，放了在方格子，只有14view，搏得了2個留言。也只是2個留言。我本來的想法是測試讀者反應，OK就去投個稿或者給個新住民出版選甚麼的。但，回過頭來想，可能終究是沒有才能吧。也沒辦法。

說穿了也是自己懶，只喜歡活自己的世界，不想與其他人類接觸。然而又不是房思琪張愛玲，你的生活，有誰會關心有誰會想知道？但我又只能寫這樣的東西，好像，沒有辦法變得更好。

最近因為一些原因，又開始了無謂的幻想。沒想到這把年紀還會胡思亂想，而，你問我，我是有點兒期待。畢竟人在他鄉，很多地方沒去過，好想去一去，試一試。只不過最近天氣老是不好，就少出門了。

岩岩無啦啦俾人兇，無心機做嘢。hea陣再繼續或唔繼續。以前係香港返工好多情緒，呢兩年轉咗場，我同自己講，份糧唔需要我咁多情緒。而且，都解決唔到問題。聽唔到你講既人，就係聽唔到。唔理你既人，就係唔理你。依家只有一個小目標，拿拿林儲夠錢，去考個的士牌。四圍去睇下呢個世界，過埋臨尾呢幾年，就算。做人，其實都無乜期望了，反正一早就知自己無資格選擇將來，咪，算囉。

呢幾日放工，如常屈膝係房間食飯，突然唸，唉，依家都係靠份工先至交到租，食到飯。無咗份工，無收入，就乜都無，連瓦遮頭都無。你問我呢，我由頭大都知自己唔適合返工。我鐘意做野或創作，只係，搵唔到食，無飯開，都無計。

近嚟鐘意聽個塔羅師直播，唔知點解覺得幾中。好切合我心入面對自己既形象。雖然聽完係無乜改善生活，只不過就，都OK啦，開心吓就算。塔羅師都幾勤力，免費大眾占卜，一個星期至少有一則。有時一路做家務一路聽，幾得意。

不過都係個句，好想快啲擺脫依家既情況，但唸兩唸，如果唔自我了斷都仲有30-40年，唔知點過。

無啦啦收到好爺message真係燥咗，話好耐無見最近係咪好忙。我心唸，diu，我上個月咪約過你一次囉，你放咗我飛機之嘛。不過又咁講，嚟到高雄，個心都係成日想搵啲可以一齊出門既朋友。兩個月去一次，搵個半日遊咁。可惜，無囉。咁我可能唔係一個好既旅伴，都話唔定。

最近想租車去一個小地方，屏東原住民部落，有吊橋，有落石。個啲應該都唔太會係旅客去既地方。都無既，我只想放鬆吓咁啫。記得，以前讀舒國治，開始沉迷，就係編輯個句標語，不要絕望，你絕對可以流浪。這成為了我的希望之一。但係，流浪真係好曬錢。咁如果你OK訓街，唔沖涼，苦行僧咁，就無問題。可惜我又做唔到。

咁唸落，我都只係用自己喜歡既方式，用自己既角度去面對呢個世界。其他人接收唔到，都唔出奇。既然接收唔到，就自然無辦法意會，無辦法意會，就無辦法受歡迎，同時亦都無辦法有收獲。都只不過係咁。

當你做既野，無巿場，自然唔會受巿場青睞。