來吧，有錢錢的工作

埋單計數今個月差313TWD，大約100HKD。好過上個月少少，因為最尾一個星期執到一單，岩岩好填到數，交到租。真係一額汗。本來單job以為無咗，對方遲遲未覆，最後我係幾乎以割喉式價錢幫佢做，只希望對方即日覆實過數。過數兩日內要起40頁版，好吃力，但，無辦法，同自己講，要撐住。


單job本來都傾咗成個星期，最初都係差不多40頁，從零開始16K。等咗個幾星期，對方都無覆，只係拖，不斷報價。其實我都估到佢攞我報價再去搵其他報，對方可能做到燥底，結案或者斷尾，又或者用咗啲方式嚟全身而退，唔再接。之後單job就嚟到我到，我一打開份稿，噢，果然如此。


排版上我覺得最難既係要執其他設計師手尾。唔係咁多設計師，應該話大部份設計師既設計，都唔係為咗要人執手尾、要其他人改稿而做。應該都係一個人或者公司可以內部修改而製作。


呢個設計師都算好手尾，字無outlilne，而且都係MS正黑體。又會咁好人都有，我唔洗重新打字，謝天謝地。即使係咁，有幾頁多圖既，我都執咗三、四個鐘先搞掂。叫做都OK啦，起馬唔洗重做。因為客人係會覺得既然都有個PDF，咪即係做好咗囉？做乜要搞咁多嘢，要收咁多錢？中間需要幾多時間同心血都好難形容，作為一個做書既人，我只能夠講，排版係守尾門，如果我收少啲錢，可以令到本書順利面世，我寧願收少啲──當然只係收少啲，而唔係唔收啦。



生存壓力依然好大，係有別於香港既大。但我知道以我既個性早晚有一日會遇到呢個問題，依家唯有希望身體唔好出事，如果唔係又無錢醫病係好很大鑊。我唔想承受咁多痛苦，都可能係細個無承受足夠痛苦，大個就好苦了。


30歲之後我只有少數幾個願望，希望臨終時候可以少受一啲苦。不過呀，人生都苦多樂少，吃得苦雖然未必會做人上人，但至少在世上活着的苦會少受一點。意思是，當你覺得苦瓜苦，苦瓜就苦。


最近是每天都跟自己說要趕快找到新公司，換工作，希望薪水至少提到30K以上。現在的工作每天都提心吊膽，不知老細幾時發難渣，不知自己幾時會病，會頂唔順。依家每個月都唔夠錢用，手頭好緊張。用曬所有方法都賺唔到乜嘢錢咁濟，經濟情況最緊張係今年，希望下半年可以搵多啲，至少唔洗再問人借。我真係好唔想經濟情況再惡化落去。