急急如律令

 

上星期報咗一份本身好急既排版，一星期內起稿，對方一直拖，我都心知咩事。覺得我報得貴，想搵第二個做。過咗截稿日，起身時突然收到message，對方問可唔可以幫佢排30頁，第二日中午前完稿。唔夠24個鐘喎，要通宵做。但我第一個念頭係，接，即刻接。

30頁，即係有around 2000 HKD，可以解決好多問題。前題係佢要即刻過數比訂，如果唔係我唔開工。中間我仲幫佢打咗個折，平啲，等佢可以唔洗唸，立即做決定。我既重點係馬上收到訂，收到訂就成功咗一半。不過我個心依然係有少少傷，本來呢單全部比我做，既唔會出事，又可以收到整數。依家只能夠收一半，係有啲……唉，又執人手尾。

執人手尾都唔係第一次，就快成為習慣。好多客第一次搵我報，都覺得我貴。搵個平既去做。人之常情。但太平，真係唔好用。用到最後，往往係對方反咗面，或者超過咗人地底線。份稿會搞唔掂，會爛尾，之後又嚟搵我。識得搵我返都仲有得夠，但係對方既唸法係，份稿我只係「copy之前個版」落去砌，唔洗設計。係我既立場，如果無原ID 或者 AI原檔，其實係要重做。

等咗兩三個鐘，對方仲未覆係咪要落手做。都有一個可能係，我落手做，要收A呢個錢。佢走去搵返原本個設計師，雖然可能本身鬧翻咗，但都有可能係用一個更低既價錢去處理。咪就加錢加頁啫，原設計師，可能加10頁，每頁100，都得。因為對佢嚟講係同一件事，同一單job。而對我嚟講係一單新job。

無既，都係個句啦，你係客，你鐘意。本書出唔出到，係你話事，決定權不在我手上。嘸理由你無委托我去做，調轉頭話我開價太高，搞到佢出唔到書呀嘛……不過其實呢啲人好多。

最近返工又落入個種，理Q得你既情況。講真我係有少少莫明奇妙，將啲唔關我事既責任壓落我到，仲想我揹起佢。我先至唔會。我既性格係有啲克人憎既，基本上係唔會幫上層揹，如果上層做啲好無謂既決定，我唔會承接呢種痛苦，會拖埋佢一齊痛。

咁無理由嘛，你公司做既決策，老細做既決定，點解會係我一個人承擔曬。而我問心，程序上都無錯，只係一直同你confirm。所有決定都係你做，咁你仲有乜好講。但我估唔到最近真係遇到個咁既老細，明明係佢話事，佢係推得就推，缷得就缷，講到完全唔關佢事咁。我心唸，你把口點講都無用，間公司係你既，蝕錢既係你。你搵我出氣結果都唔會改變。

不過我返工既態度查實咁多年都係差唔多。試過投放好多熱情，結果被討論。試過冷淡面對，又比人話唔緊張。最離奇係比人話我對公司無感情。我做乜要對份工有感情？應該咁講，以前做書，好鐘意書，因為書對我嚟講係好重要既事，關於書既嘢我好着緊，亦都容易有情緒上既起伏。但我係對書，唔係對公司。

依家返工既狀況，我只能夠講，希望快啲搵到新工。留多一日係到，都係提心吊膽。我唔想係一個咁不安既狀態工作，你唔會知老細幾時無糧出比你，幾時屈你，幾時又推一堆屎過嚟要你硬食。我好想，快啲搵到新工。起馬多2000人工，叫做幫補下。

月初因為經濟困難，忍唔住又上網求籤，我feel到其實係求到啲菩薩唔想理我了。咁又的確係既，無論做咩事都應該靠自己。鬼叫自己廢咩。籤文都講到明，無人脈，搵工難。我又真係無人脈，無辦法。

不如意向朋友吐苦水。阿匐罕有叫我搵工，佢話，你有實力，欠啲運氣。真係少有，佢以前都覺得我廢，成日呻，無目標又唔肯努力。

寫到呢到，唸起今朝段message，突然有啲可惜，好可能無咗張單。明明傾咗成個星期。不過算啦，唔係我財唔落我袋，唯有再繼續搵。希望快啲搵到，至少每個月搵到一單job。依家係好努力避免經濟崩潰。就算做通宵都要同自己講，唔可以令經濟再差落去。一定要賺多啲錢。

正職同副業雙重夾擊已經係事實，而freelance好難搵，亦都係一個事實。我好想扭轉呢個局面，努力咗半年，好似無起色。係真心有啲唔知點算。好想快啲迎來轉機。