上月幫拍檔訂了800元貨，貨到付款。她說後付，貨反正沒那麼快到，我就說OK。三星期過去，我跟她說，呢個星期埋一埋條數啦，加埋今個月運費都900幾。她說沒錢，要等老細返嚟先有錢。
我話，吓唔係掛，你尋日先用我account訂野，現金比咗1600人哋喎。無錢不如我取消張單啦。
講真，我好怕突然到貨，收唔到錢，又無錢取貨。三次未取紀錄就會停權。而且，有幾舊水，我可以捱到出糧。
過幾日，她又說先過400蚊給我。我也沒說OK不OK。過幾日，她說滙款了。
45蚊。
我心裡面講咗聲diu。
傾多兩句，我發現呢一年嚟幫佢訂嘢，佢一路話自己開團幫客代購，原來唔係。係佢老細叫佢幫手買。每一單貨，我只係賺5HKD左右，收貨寄貨，每一單起馬都要兩個鐘。交通唔係咁方便，要幫佢幫鋪頭問，問完佢唔要空手而回，車錢都無。去寄貨，要人肉拎住6、7KG，踩單車去郵局，報關、寄，仲有機會比人查稅。
咁當然我都有利益，幫佢買嘢一個月既錢，可以減少我好多海外滙款手續費。前題係，佢肯比。
衝突和磨擦一路都有。不過我唔OK合作夥伴唔誠實。大佬，如果係你嘅嘢，我幫你搞，平少少，我OK，錢係你賺。但如果係你老細既嘢，點解你唔叫你老細直接搵我傾條件？
之前佢成日好趕咁叫我iBon印嘢，問咗幾次都話自己嘢。咁，我當然就唔信既，不過算啦。印一張，賺2毫子，無乜技術但好花時間，一間唔夠紙，要行一公里去第二間。而且幫佢印嘢都係唔收錢住。試過印咗半個星期飯錢，佢一個月後先比我。
積積埋埋好多合作問題，例如佢明明話要集單買嘢，叫我某年月日stand by唔好出門。差不多夠時間，無曬聲氣。叫咗佢訂嘢之前話聲我知，我個段時間未必係屋企，可能出咗去帶團。佢又唔講，突然催我，要拎6K貨*3，仲話：叫咗你拎手推車。
我呆咗呆，問題唔係呢到喎，你早啲同我講，我可以安排分時間去拎。再者，拎貨都要交通費，賺埋賺埋都唔夠比。
好多嘢佢又唔想傾，剩係叫我做。我有少少疏忽就diu，OK，有次我寄嘢有空隙，個盒扁咗，下次小心啲。塞實曬，結果係成盒變型，咁，唔關我事喎。叫我開箱拍片對吓啲貨齊唔齊，but，我唔知佢訂咩貨，無list，有list都無用，無代碼，啲公仔個個一樣樣，堅係分唔到。拍片比佢佢自己對啦，又話自己唔睇。我都嬲嬲地。
突然間佢又寄一封信，叫我去台北拎嘢。我話，吓，我唔去台北喎呢半年都。佢話，但我買咗啦喎。
唔係呀大佬，咁你都問下我得唔得先啦下話。
等我約好曬，做好曬所有嘢，訂車票個刻再同佢confirm。佢居然話：唔洗啦，唔拎啦，唔去啦⋯⋯我真係堅嬲。
這個月工作狀況不是很好，不在狀態。不在狀態原因一半是天氣，每晚都地震，一晚醒三次。二嚟係對公司嘢唔上心，依家公司咁樣既行事方式，唔會長久，總之SOP搞唔掂。明明係一間「公司」但行事風格係「個人」，咁都無所謂，好多中小型企業都係咁，靠老闆一個人撐場。
不過我係真心唔鐘意工作文化，唔去唸點解犯錯，而係不斷推缷，總之唔關我事，唔好誤會。呢個星期工作上犯咗唔少錯，都係啲錢銀問題。前因係我接手另一個同事做緊嘅嘢，本來有個sales跟開，我問個sales細節，佢次次都hea鳩我。我再問佢，佢話：你搞到我亂曬。
我呆咗呆，吓，亂咪搵答案囉，你diu鳩我無意思㗎喎。然後佢又搵極都搵唔到答案。ok la咁你搵唔到答案，我咪跟電腦紀錄去做。點Q知原來電腦記錄係錯，我咪跟住錯。佢又發我難咋。
其他公司嚟追數，我話我出咗單啦，做咗啦我個part。間公司既會計見問我無用，走去問老細既親信，親信周圍同人講，話我唔睬公司A，佢自己走去同老闆追。結果老闆都仲係唔出數，公司A就狂催個親信，親信就話：好煩呀一直催。
我心唸，咁，唔關我事。
最近返工就真係呢種無乜靈魂既狀態，因為真係唔關我事。個啲嘢我又未做過，又無人教，問落先知全公司都無人做過。都無所謂既，無人做過咪一切研究囉，我第一次做，做錯都好正常啫下話。但佢地就覺得蝕錢，因為我犯錯。咁查實個單野，你過比其他公司有經驗既人做，個成本都只係高咗100蚊港紙唔到，乾手淨腳。咁點解要自己承擔呢個風險。
只不過出嚟做野咁多年都明白，老細自己犯錯係老細自己吞。我提佢，佢只會覺得我煩。咁我就不如一齊錯囉。你提佢，佢覺得你條友認屎認屁；你同佢一齊錯，佢覺得有同儕感。而且，呢個老細都係好典型憑情緒同感覺做事，佢對你印象好，你做錯啲乜，佢都會幫你；佢對你印象唔好，你做啱100件事，佢都係diu鳩你。咁我又何必咁上心。
換轉一兩年前，我會嬲到訓唔著。覺得啲咁小既事做乜唔做好佢，或者大家行前一步，一齊做好啲。依家，我真係理鳩得佢，最緊要準時出糧，交到租，找到數，其他嘢，唔理得咁多。
前面條路依然係堀緊路，好難行。今日唔知聽日事，雖然未至於好似香港咁絕望，不過都依然樂觀唔起嚟。每日起身都為咗自己仲醒得返而失望，不過你問我，真係面對死亡我會有咩反應，暫時我都係答唔到。捱多半年先啦，依家都目標OK既，轉去一啲比較有規模既大公司再做一兩年，熟習流程之後，希望可以做到自己既流程，過自己鐘意既日子。
做人都係咁囉，唔係咁，查實，都唔知仲可以點。
留言
張貼留言