發脾四

 大過年的忍不住發了次大脾氣。話說前夜在幫舊同事東跑西跑，取她動漫節訂的東西、包裹，每個都6、7KG。走去誠品幫她看看限量的書有沒有，頂着10度寒風未吃飯，又去7-11幫她印東西，一印又半小時。本來想在7-11吃一吃就算，但又想到過時過節吃7-11很可憐，便想回房間，弄點甚麼的。

房間的大燈壞了，插地燈時，因為太黑，不小心手指插進了插頭，大年夜的觸電。確認自己沒死之後，開始一一拍照把東西傳給她。然後轉帳滙錢。好幾個帳戶，轉到最後一個金額最大，將近1800HKD，她突然催我，問我幾時滙款。

無明火起！唔滙啦！即時退錢比你！

堅嬲。唔撚係掛，我由4點鐘就一路同你chat，一路做緊你要我做既嘢，由去取貨、print嘢，拎書，每箱6K來回兩三次。開箱影嘢，搞足4個鐘未食飯，一路都report比你，每一個步驟等你confirm，呢上一壇嘢都未搞掂就催我下一步？大佬我又唔係失咗蹤，又唔係拎咗錢走人，我係keep住整。

其實都忍咗成個月先爆。動漫節之前已經燥燥哋。佢要訂嘢，我問佢要訂乜，佢就咁send 條link出嚟，條link入面10幾個item，唔撚知佢要啲乜。問佢，佢又話已經講得好清楚。再問佢又嬲。

舊年我已經set up咗個格式，叫佢落單個時跟。佢直頭唔理，自己開過個新excel，又係全部都睇唔明。即係我好簡單啫，書名作者出版社數量，佢死都唔填。我係連書店都唔知，佢又話要贈品，叫我現場對，對齊曬咁多樣，佢先會買。我每次都企係鋪頭，等佢confirm，每次都搞半個鐘以上。佢唔買，我時間同車錢都蝕埋。

前個輪要係蝦皮搵代買，佢又係一link車埋嚟。我放棄思考，原文複製比個賣家。賣家問，你想要邊一樣呀？你條link好多款式，有啲係贈品喎。我照樣將賣家對家cop比佢，佢話：

講得咁清楚佢都唔知我都唔知點講喎。

好，既然係咁，唔好買囉。我叫佢一係搵第二個，一係放棄。但唔知點解佢對個賣家好執着，煩足人地一個月，不斷來來回回的message。我心想，個賣家真係好脾氣，仲繼續覆，比我就唔鳩理。啲對話通常係咁：

賣家：這條link你需要邊樣呀？

佢：麻煩佢去現場影張相比我睇下。

賣家：（影相）我係現場你有邊樣想要呀？

佢：手機睇張相好細喎。

賣家：決定咗要邊樣未？

佢：要返一開始我想要個樣。

賣家：現場無貨呀。

佢：再麻煩佢睇下。

賣家：現場真係無，其他都有呀！

佢：咁樣麻煩佢了。

完全唔知up乜鳩。人哋真係唔買，佢就死loop，去到動漫節最後一日之前個晚，先話搵其他賣家。要我等到佢1030，佢要搵比我。

我心唸都係一兩個啫，等到最後一刻，佢send咗10幾條link比我⋯⋯痴線，每條link都要問，要等報價，要呢個樣，我係蝦皮比人message問候足成個月都仲未夠，仲要漏夜幫佢問，比diu足十幾次？我唸兩唸算鳩數，聽日返公司先搞。

點知第二朝仲搭緊巴士，8點佢就打嚟叫我即係上蝦皮幫佢買。一睇，哇6000蚊喎。我話我無錢呀，痴線突然要我買，我仲要去銀行拎，而且一星期我只係出去一次，你又唔係唔知，一早講嘢你有嘢買要入定錢，我將啲港紙換定台幣。台灣又唔收HK信用卡，就算收都無用，我仲搭緊車返公司，基本搞唔掂。

之後個幾日，一日幾個電話狂打嚟，買呢樣買個樣。煩到痴線。

如果係新相識我可能都會忍多一兩次，但都識咗七八年，我係一次都無，一次都無應承咗之後，限期內做唔到，係一次都無囉。居然係我忙緊佢要我忙既事個時，狂催。

我都好忙㗎！今晚要陪老母行花巿，唔洗訓啦！

diu，退錢，唔賺。而且賺埋根本都唔夠俾交通費。message都唔覆，咪撚再煩我。

查實問題不會是一天以內發生，一定累積了好久和好長一段時間。爆發在於一直講一直反映，對方充耳不聞。人類都很奇怪，只想去「安撫情緒」，不去處理問題。安撫當然重要，先讓情緒平和，但平和後要解決問題，你一直不解決，之後又再發生。

不過我也是修練不夠，每次嚟到呢啲位都會燥到爆。每次問啲客，到底你幾時要份稿，幾時deadline，死都唔講。突然打嚟話三個鐘頭後要，我真係睬佢都儍。

但也因為我這種性格，事業才一直無法開展吧。所以才每個月汲汲營營於錢不夠的狀態吧。到底甚麼時候我才可以享有我的自由呢？這麼想着想着，一年又過去了啦。