情緒低落

 無啦啦返工俾人diu咗鑊,依家工作情緒極低。罷工半日。我同自己講,唔緊要,好快我就會離開呢到,去做我自己想做既事。擺脫呢種朝九晚五既生活。

上回講到報咗個媒合會,呢個算係我兩三個月嚟,最期待既事。媒合會三十人參加,每人有3分鐘present,其實係2.5分鐘再加30秒對方問問題。雖然同我期待有少少落差,我以為有好幾間公司,可以in幾次。即係似啲求職博覽,最後係一間,嚟咗兩個HR同埋一個中高層。

A、B、C三個人。C呢,係面試時最刁鑽 ,好多面試者都比佢留難。例如問好多你屋企人支唔支持你,如果唔支持好難做。又例如問佢做乜呢個年紀嚟轉行。之類。A呢,通常係鼓勵同比支持,即係講完之後大家會舒服既類型,而A係最高層。

輪到我個時,C反而無為難我,仲傾得幾開心。相反A就好似忙緊其他嘢,無望過我亦都無出聲。然後我就走咗。

面試之前兩日,我就係到唸,到底要點講。我唸,因為無人介紹,經驗都唔算深,我能夠表現既就係自信,除此之外就無了。而結果,我覺得自己現場表現還不錯,但係佢地點唸就唔清楚。因為,我自己覺得啦,無咩證實。台灣人工作文化都係好中國,好古早。佢地好講究一種唔太現代既忠誠。如果我話瞞住老闆去見工,去帶團,佢地未必鐘意,會覺得我暪住老細。

唔理佢地點唸,我只知道自己要搵機會。我唔想再變成被選擇既人,我要有自己既選擇權。而唔係乜鳩都硬食。我會做到的。無論如何都會做到。回到我讀書時既初衷,要自由。要找到最終最大的自由。

自由才會有體驗。這一世體驗過後,我就會去到慈愛的,和善的淨土。不再入輪迴。

留言