叉一叉電

 

心情不是很好，昨天去看牙醫，一坐在手術床上，就說要收3000，下次收2萬。我心唸，吓，痴線喎，乜都無同我講過。一訓低就整，整完問，你要做2萬定2萬5。我問佢，乜嚟架，2萬同2萬5有咩分別。佢話，2萬5貴啲硬啲囉，2萬都夠用架啦。

講咗等於無講。

不過台灣啲醫生都係咁。佢大曬，話乜就乜，做任何治療都唔洗病人同意。呢啲位，其實我唔太樂觀。不過人生都真係咁，當我好需要錢既時候，搵唔到，仲會病。

因為病接咗單report既job嚟做。算係半懺悔文啦，因為素材唔OK，所以我做得好hea，又唔算好hea既，50%-60%啦。以前仲會唸，會就吓啲客。今次係出奇地強硬，真係一粒字都唔幫佢校稿，唔幫佢整。佢地自己又亂咁嚟，稿唔齊，圖唔齊，催足一個幾月都唔齊。

咁佢fucking care我咪都唔care。自由業咗兩年，終於做到，個客唔理，我都理。但，其實我個心係唔開心既，因為唔係共同去做一件事。同埋，我都只係唔開心，憑自己既能力，無辦法搵夠自己生活既錢。腰骨錢。

今個月開支還是很大，我在想8月去考個職業駕照。但職業駕照也要1萬多TWD，超出我入許多許多。左度右度，覺得呢件事依然要做，如果唔係，一旦失業，係台灣就無曬維生方法。另外，亦都要找機會出團。此外，衫褲鞋等日用品都要補給。上次買鞋都經已係三年幾前，係香港買。到依家，對鞋都穿曬底。本身係香港收入都唔高，依家係台灣依然最低工資。都無既，晚叫你窮，頂硬上。唔做流浪漢已經好好。我搵錢既方法又少，都無計，自己唔醒目。

但我依然以車導為短期目標，車導之後，就回顧到初時內容創作心態。坦白講，呢個可能先至係最初，或是最終，可以維持生計既方法。而我發現，最近自己既狀態都嘛嘛，總得好似，好快又輪迴返去，無乜點休息到。

我想去一日至兩日小旅行，叉一叉電，影返幾張自己滿意既相。有啲嘢就係咁，要抽離平日日常，就會好啲。做啲平時唔做既野，就會好啲。計一計，下個休息日係14日後，再下個位息日係24日後，距離仲有好遠，中間仲要做一次手術，希望捱到啦。