最近又比人diu「工作態度」，唔係話差，係話咩唔緊張，無危機意識……9 up。我記得上次咁比人diu既時候，已經係五年前，個時係伏公司，負責一個project做到第十個月，老細突然空降一位大台前主管，話要做我上司。我OK既，咁咪做囉。
當時我算係一個獨立部門，同team同事係大陸，遙距溝通。說同team都有啲勉強，因為老細既唸法係，搵兩team人嚟做同樣既事，睇一年後邊個跑出。做咗半年，我個邊大約已經成型。成型之後，就係要開發客戶，但公司無比sales我，我唯有自己去搵客，搵到客再彈比啲sales跟。點知，啲sales原本一單5000蚊既job，對我既客就開8000。
中間仲發生咗一啲事，直到第十個月，嚟咗位名義上既主管。我問過老細，咁我依家係咪under佢，老細話11月前都唔會，然後陸續將我啲人手抽過去。咁我OK既，反正我一個人都處理到。過咗一個月，主管突然話要開大會，話咩佢地個個好辛苦，做到夜晚十一點。老細好讚賞呢個主管，話呢啲就叫管理。我心唸，咁你比管理層既人工佢，我係內容創意咋喎，我管好我條channel咪得。
之後開始老細就覺得我「態度唔好」，無講出聲既。私底下討論。因為我返工好少會同同事打交道、社交，私交就幾多吓。我到個一刻都知，慣得再去爭取啲乜，我完成咗我既任務，開始搵新工。
不過華人社會都係咁，唔睇你工作能力同實力，睇你工作「態度」。勁抽象，做人好過做事，你哈巴狗咁，做到一鑊粥，但依然係會比無乜犯錯既人，容易留低。你同同事關係好，自然就會有人幫你講說話。我無辦法，呢啲唔符合我性格。我都係將手頭上既事情，做一做，做好，就收工。然後就成日比人話唔合群呀，態度唔好。
有一年我係A公司返工，講真我真係交唔到戲，好唔俾面。然後佢地就開個細group講我既工作態度。又係啲咩緊張，唔理呢樣個樣。個時已係係間公司做咗一年半，我用咗一年半時間同主編溝通，個版面要咁喎，啲相要咁喎。主編係無理過，每次我做完版，佢瞄一眼，就掉落垃圾桶(正確係廢紙回收箱)。到咗第一年零四個月，我受唔住，每次排版都等佢有時間，走埋嚟我個位，先開始微調。跟住佢地就話我返工唔做野諸如此類……呃……係咁架啦。
相反我另一位同事，即係圓周啦，就好識做人。星期六會去上教主既堂，又識得笑笑口，係咩係咩等等。又唔太會抱怨公司既事情。但佢目標好明確，默默地搵工。唔似得我，仍然係鳩hea同知自己做緊啲乜。
只可惜我個性上真係搞唔掂，是非黑白分得太清楚，唔係好事。最近youtube推咗條片，係一個youtuber講MBTI，分析INFJ人格，講中咗幾個point。唔適合係同一個工作崗位太耐，唔係唔合群而係享受收工既自由。真心，我覺得好中point。呢啲係我都無發現到既事。
講起INFJ，2兩年前做過一次，偶然有個朋友係FB po文，咪做下囉。做完之後一度覺得︰仆街啦，我做乜仲留係呢個世界？快啲死一死。全世界只佔1%……大學個時流行「做自己」，我當時已經話，做自己而覺得幸福既人，根本同其他人無分別。大學畢業之後更加，我每隔一兩個月，總會唸一次，天呀，點解我唔係好似其他人咁。尤其係香港呢個咁單一既社會，我係覺得好痛苦。一直到發現HF169呢個方案，我個心係突然間靜咗，原來，仲有後路可退。
無既，因為blogger我當日記、周記咁寫。心底話會寫得多啲。如果亦因為咁而損害到經濟，我都無辦法。或者呢個係我一生當中，無法克服既事。
話又說回來，最近比人話，我咩無理公司賺定蝕之類。如果個筆交易蝕錢要同老細講。吓，個單野，做完啦喎。我工作流程都係sales報完價，然後打單。個單交易其實做完架啦。咁點解公司蝕唔蝕錢，會壓落我到？
我唯有當佢地唱歌，呢啲無厘頭既責任同埋無必要既情緒。以及，對住呢啲人，我係唔太會用腦，咁你用腦就會有判斷，有判斷就會有價值觀，要選擇點樣做。我依家返工係將個選擇權比曬上頭，你話點就點。然後上頭就抓狂。你地都話聽我指示，這樣不對。
哦……你唔郁我份糧就得，你鐘意點講就點講。依家呢一刻，為肚皮。係香港有時仲可以為啖氣。人唔係香港，真係搞唔掂。一定要先唸肚皮，吞聲忍氣。一定要忍到一個更好既環境先至向前行。
留言
張貼留言