唔想理

 

生平第一次返工返到咁無靈魂，以前都鳩hea既，不過真係未試過好似依家咁無靈魂，完全唔想用腦。好處係，放工唔會再因為自己做錯事而訓唔着，壞處係，一點點咁磨蝕緊心情。

目前經濟狀況有點兒無解，正職工作唔夠開飯交租，副業收入唔穩定，每日既經濟壓力都好大。比較煩惱係目前無乜方法解決呢個問題，台灣搵part time無香港咁易，要識人先得。而我自己又唔係好擅長處理人既問題，咁就hold住先，要搵到一個確定方法，真係有改善，先跳出去。

最近返工又發生咗啲事，小事，但搞到我又想搵工。同肥灰傾咗兩句，佢一睇就話，老細無承擔，你自己睇路。講中咗我心裡面個句。事情源起其實係好蚊型既事，某組客人想買限量產品，預訂，要落訂，負責同事就話，你幫佢排隊買啦。咁我就搵對家公司，填表申請，對家同事覆OK，有update話你知。

到咗第二日，對家公司就話，尋日個幾張單後補呀，前面仲有幾個人排隊。我話，好呀，咁我話比負責同事知。點知負責同事燥咗，問我，吓，尋日又話OK，點解今日變後補？我呆咗，吓，有乜問題。佢要我開對話紀錄，我咪開比佢睇，佢睇完話，佢咁覆即係話買到啦，唔係咩？尋日有，今日無？

我未反應過嚟，佢就打去鬧爆對方公司，你有無搞錯，尋日今日又無，點解會咁，你有咩解決方案？你要點做？你教我點樣同客人講！！足足搞咗三個鐘，每一個鐘打去鬧一次。

我係側邊就唔講嘢了，有冇咁大件事啫，買唔到咪算囉，你又無收個客錢，而且後補咪後補囉，不嬲買限量品都係後補或者抽獎，有乜咁大不了。換轉係我，我應該第一時間講，sor依家後補，可能要等幾日先有消息。咪得囉，做乜打去diu9人。

佢diu完對家到diu9我。一日唔夠，第二日繼續，再加多腳，搵主管diu多鑊︰「你唔明你唔明啲乜既時候要問呀！」我份曬嘢，哦，係咩，OK，好，咁個客仲要唔要？

要！點解唔要？你搵有冇類似既產品，話比我知。然後我搵咗成日，都搵唔到。又過咗一日，後補終於補到，但係要24小時內比錢。我馬上通知負責同事，仲有24個鐘，扣咗訓覺8個鐘，肯定夠時間。我當第二朝9點個客比錢，仲有4個鐘。

點知等等等等，催完又催。每催一次，負責同事就鬧一次。你鬧我，我個心已經勁唔舒服。我心唸，diu，咁咪唔好買囉，個客又唔係我既。等等等，等到超時一個鐘，對家幫手hold住。我硬住頭皮再問，想知道個客要唔到。

負責同事話︰「我唔明你講乜。」跟住咗線。吓？咁都得？我唯有覆對方，sor你押個deadline，我盡追。追到最後，負責同事心不甘情不願咁過數，然後我又馬上搵會計過數，第一階段危機解決。

呢壇野搞到我係好想快啲搵出路，導火線。之前已經試過好多次，無啦啦發難渣發脾氣，如果我錯，你罵我，我OK，我做錯我反省。但依家查實……唔……關我L事咩真心，你亂發難渣只會令我覺得，你唔係一個解決問題既人。之前係一直想堅持一年，確實有一個好啲既環境再跳。依家就有啲……既維持唔到生計，又學唔到嘢又受氣。每日返工都提心吊膽……雖然收工係完全零責任，可以唔撚理，不過咁落去，唔知捱唔捱到冬天。各種各樣既考量。

依家經濟情況已經唔容許我再懶懶散咁處理，要加緊腳步，如果都只有等住餓死。不過呢樣都係好正常，好合理，以我既資歷和身分，成日都只係想做自己鐘意既野，其他野又唔掂，咪搞成咁囉。你叫我去創業或開鋪，結果好可能都係相同後果，最好都係靜靜地接下job。

最近又開始動念搵好爺一齊做啲小生意，探咗佢幾句口風，都係罷就。之前識個攝影師，佢又玩到賣相機。到頭來都係肥灰個句，呢啲係你想做，其係我想做。唸兩唸，都的確係。so~~都無所謂。

講開又講，三月之後就無去過之前成日去既團體蒲頭，佢地都無搵我。可能係主持人唔likey，有乜活動都無再搵我。唸起個吓有啲介意，寫咗出嚟又覺得無乜。同上，佢地想做佢地想做既事，我比意見，佢覺得呢啲意見唔好，咪算囉，無謂搞咁多。講個簡單既例子，有日傾開關於外傭處境同困難，我問，有啲咩係常遇到，點解答，佢地話︰

「勞工處個網有曬。」

我當場呆咗，吓……即係，人哋問起你，你叫人搵勞工處，而唔係搵你機構？慢慢都發現，佢地都只係另一個教主式公司團體，要既係人與人之間，個種靠關係得嚟既聚集。而唔係真正想要令社會大眾或整體生活提升。然後又唸，或者，一路以嚟都係我誤會，我誤會咗好爺想要有穩定而受人尊重既生活，或者有一份自己鐘意既工作。可能佢同我一樣，鐘意一路diu9老細一路打工。

依家無好似前幾年，經常幫人出主意，都會假假地同人講，一齊唸辦法啦。講囉，真係坐低唸再算。好多人一坐低就講廢話，認真要confirm野無耐性聽。每個人都係咁，自己生存到落去就得，無所謂啦。