明日照樣

 

心情不是很好，這幾個月都很差。我唸，最主要係覺得自己做既嘢，未達到自己滿意既水平。有啲就全然係自己既問題，因為啲嘢未熟手，甩漏頗多。而個客就無特別講，真心有少少覺得佢陰我。

事源係某日由A同事手上接咗單case，接呢單case返嚟既sales已經辭咗職。接手既sales，其實唔太理件事，就掉落嚟我部門。我拎到份稿，問咗一輪，都係個啲啦，你問佢佢hea答。乜資料都無，咁我唯有按常識去做事。

做起份稿，我send俾個sales。你對清楚呀，我唔知你哋之前發生咗咩事。好啦，份資料一個月前出去，有錯，sales無睇，個客見到有唔同，又唔返嚟問喎，直接就話︰你份餐單寫咗係咁，我同咗個客講啦，你送俾我。

送完咗個布甸，都算。過咗一個月，個客突然話，喂你份野又唔岩喎，仲要送多杯酒。我心唸，吓？做乜要送酒？合約上個無，但原來我哋美編時用咗張圖，圖入面有杯紅酒。我呆撚咗。

因為呢兩件事，俾上司吊足幾日。一杯酒around HKD30，呢一餐around 30*20*4=2400TWD。按照台灣既勞基法同埋員工守則，佢係可以全扣我人工，唔洗通知。最PK係，不斷俾人鳩diu，話我發現問題無問。

我心唸，算，唯有硬食。

另一單更謊謬。某公司高層要出團，佢帶。一路以嚟，我同佢部下聯繫。講好曬啲嘢點做。某個星期日，我上司突然打嚟diu9我話做乜我啲資料無俾高層。我當下唸，點覆都死，因為，我真係無俾佢高層，我俾佢部下。但我話俾佢部下無用喎，佢一定diu做乜唔直接對高層。

「你無佢高層電話你主動問我拎呀嘛！佢今朝一打嚟就鬧鳩我。」

sor囉佢打嚟鬧你，咁，我可以點。都要等放完假先俾到佢架啦。都無既，俾佢鬧幾句，發洩完就算。都係個句，其實大家都係鬥陰濕，唔係做好件事。你發現唔岩，又唔話我知，咁我green囉，咪硬食。

最近做稿都係咁，個客份稿好多問題。我都唸過同唔同佢講，唸咗輪，算，我又唔係校對。都係留俾校對做呢啲野。結果個客又係狂鬧，你做乜唔校對，之類。你好聲好氣，態度好，咪算。態度唔好，咁，我知都同你講啦。

依家返工係同係HK個時唔一樣既唔開心，你問我有冇好似香港個時咁唔開心，咁又無。但依家個問題係，唔開心之餘，生活唔夠錢。10K港紙都無，真係好難捱。而因為最近工作既事情，令我開始想返去。不過，返去又點，返去咪一樣有可能搵唔到工。以依家情況嚟講，留低暫時都仲有飯開。

好卑微。為咗開飯。唉，我唔想咁。到底點樣先可以做返自己開心既嘢，開開心心，覺得每一日係值得既。唔似得依家，或者呢幾年，每一日都覺得毫無意義，唔想聽日再係咁過日子。